ኣብ ኣዲስ ኣበባ ምብጻሕ ዘካየደ ላዕለዋይ ኣዛዚ ሰራዊት ኣመሪካ፡ ብዛዕባ ቀይሕ ባሕሪን ጠለባት ኢትዮጵያን ኣመልኪቱ ምስ ፊልድ ማርሻል ብርሃኑ ጁላ ከምዝተዘራረበ፡ መንግስታውያን ማዕከናት ዜና ኢትዮጵያ ሓቢረን።
ኣዛዚ ኣፍሪካንን ኮማንድ ሰራዊት ኣመሪካ ዝኾነ ጀነራል ዳግቪን ኣንደርሰን፡ ምስ ቀዳማይ ሚኒስተር ኣቢይ ኣሕመድ ኣብ ዘካየዶ ርክብ ብዛዕባ “ዞባዊ ጸጥታ” ኣመልኪቱ ከምዝተዘራረበ፡ ቀዳማይ ሚኒስተር ኣብይ ኣብ ናይ X ሕሳቡ ኣብ ዘቀመጦ ጽሑፍ ዝገለጸ ኮይኑ፡ እቲ ኣሜሪካዊ ጀነራል ምስ ጠቕላሊ ስታፍ ሰራዊት ኢትዮጵያ ኢታማጆር ሹም ፊልድ ማርሻል ብርሃኑ ጁላ ኣብ ዘካየዶ ልዝብ’ውን፡ ንተራ ኢትዮጵያ ኣብ ቀይሕ ባሕርን፡ ኣፍደገ ባሕሪ ክትረክብ ንተቕርቦ ዘላ ጠለባትን ኣመልኪቱ ከምዝተመያየጠ እቲ ጸብጻብ ይጠቅስ።
እቲ ኣመሪካዊ ጀነራል ምስ ፊልድ ማርሻል ብርሃኑ ጁላ ኣብ ዝገበሮ ርክብ፡ ኢትዮጵያ ብሰላማዊ መንገዲ ኣፍደገ ባሕሪ ክትረክብ ንትገብሮ ዘላ ጻዕርን ኣገባብን ከምዝድግፍ ምግላጹ፡ ሰራዊት ኢትዮጵያ ኣብ ዘውጽኦ መግለጺ ዝሓበረ ኮይኑ፡ ኢትዮጵያ ናብ ቀይሕ ባሕሪ ብምእታዉ ንሰላም ምርግጋእን እዚ ዞባ ክትሰርሕ ትእኽል ዝብል እምነት ከምዘለዎ ምግላጹ ውን”ዩ ኣብ ጸብጻቡ ገሊጹ ዝርከብ።
ይኩን እምበር ብዘይካ”ቲ ብመንግስታውያን ማዕከናት ዜና ኢትዮጵያ ዝወጸ ሓበሬታ፡ ንርክብ ኣመሪካዊ ጀነራልን ፊልድ ማርሻል ብርሃኑ ጁላን ኣመልኪቱ፡ ብወገን “ኣፍሪካ ኮማንድ” ይኹን ብወገን ኤምባሲ ኣመሪካ ኣብ ኣዲስ ኣበባ ዝኮነ ይኩን ዝተዋህበ ሓበሬታ ከምዘየለ ዝተገልጸ ኮይኑ፡ ኣብ ዑደት እቲ ጀነራል ዝተባህለ ኩሉ፡ ብወገን መንግስቲ ኢትዮጵያ ይወሃብ ምህላዉ”ዩ ሓበሬታና ዘረጋጋጽ።
ኣብ ወርሒ ነሓሰ ን”እዚ ኣፍሪካን ኮማንድ” ዝተረከበ ኣመሪካዊ ጀነራል ኣንደርሰን፡ ምስ ሃገራት ኣፍሪቃ ዘለዎ ሽርክነት ንምምዕባል ናብ ዝተፈላለያ ርእሰ ከተማታት ኣህጉር ኣፍሪቃ ምብጻሕ ከካይድን፡ ዝርርባት ክፍጽምን ምጽንሑ ዝንገር ኮይኑ፡ ምስ ፊልድ ማርሻል ብርሃኑ ጁላ ኣብ ዝገበሮ ርክብ ውን ብተመሳሳሊ፡ ክልቲኦም ኣዘዝቲ ሰራዊት ብዛዕባ ሽበራን ዞባዊ ጸጥታን ከምኡ’ውን ብዛዕባ ክልተኣዊ ምትሕግጋዝ ኣመልኪቶም ከምዝተዘራረቡ”ዩ ተገሊጹ ዝርከብ።
ኢትዮጵያ፡ ኣፍደገ ቀይሕ ባሕሪ ንምርካብን ንምውናንን ሓያል ዲፕሎማስያዊ ምንቅስቓስ ተካይድ ምህላዋ ዝፍለጥ ኮይኑ፡ ሓይሊ ባሕሪ ንምህናጽ ኣብ እተካይዶ ዘላ መስርሕ፡ ካብ ከም ሩስያን፡ ፈረንሳን ዛኣመሰላ ዓበይቲ ሃገራት፡ ገዚፍ ደገፍ ከምዘለዋ”ዩ ዝእመን።
ሰራዊት ኢትዮጵያ ብቅድሚ ትማሊ ኣብ ዘውጽኦ ተመሳሳሊ መግለጺ፡ ሓይሊ ባሕሪ ኢጣልያ ኣብ ስልጣና ትምህርቲን ምልውዋጥ ልምድን፡ ምስ ሓይሊ ባሕሪ ኢትዮጵያ ብሓባር ንምስራሕ ዘኽእል ክልተኣዊ ልዝብ” ከምዘካየደ ዝሓበረ ኮይኑ፡ ልኡኽ ሓይሊ ባሕሪ ኢጣልያ ምስ ኣዛዚ ሓይሊ ባሕሪ ኢትዮጵያ ምክትል ኣድሚራል ክንዱ ገዙ ከምዝተራኸበን፡ ክልታኣዊ ዘተ ከምዘካየደን ውን”ዩ እቲ ሓበሬታ ወሲኹ ዘረድእ።
ጉጅለ ህግደፍ ብወገኑ፡ ፕረዚደንት ዶናልድ ትራምፕ ናብ ስልጣን ድሕሪ ምምላሱ፡ ምስ ምምሕዳር ዋሽንግተን ዝጸንሖ ዝማህመነ ዝምድና ንምምሕያሽን፡ ጽምዶ ንምግባርን ብዙሕ ተበግሶታት ክወስድ ምጽንሑ፡ ወላ ውን ብገዛእ ቃላቱ ክገልጽ ዝጸንሐ ኮይኑ፡ ይኹን እምበር እቲ ንምምሕዳር ትራምፕ ዝቀረበሉ ናይ ጽምዶ መደባት ጉጅለ ህግደፍ፡ ኣበየናይ ደረጃ ምብጽሑ ዛጊት ንጹር ከምዘይኮነ”ዩ ዝንገር።
