ክፍሊ ኢሜግሬሽን ነርወይ UDI፡ ብውልቀምልካዊ ምሕደራ ጉጅለ ህግደፍ ከምዝተሰዱ ቃል ሂቦም ወረቀት ኣብ ልዕሊ ዝረኸቡ ደገፍቲ ምልኪ፡ ነዊሕ እዋን ዝወሰደ ናይ ምጽራይ መስርሕ ክካይድ ድሕሪ ምጽናሕ፡ ን20 ካባኣቶም ምሉእ ብምሉእ መንበሪ ፍቓዶም ከምዘሕደገ፡ NRK ዝተሰምየ ማዕከን ዜና እታ ሃገር ገሊጹ።
እቲ ሓሙሽተ ብዝኣባላታ ጉጅለ ዝቆመ ናይ UDI መርማሪ ኮሚተ፡ ደገፍቲ ህግደፍ ክነሶም ኣብታ ሃገር ብናይ ተገፊዕና ቃል ብምሃብ መሰል ኣብ ልዕሊ ዝረኸቡ 135 ኖርወጃውያን-ኤርትራውያን፡ ንኽልተ ዓመታት ዝቀጸለ ሕቡእ መስርሕ ምጽራይ ክገብር ምጽንሑ ዝተገልጸ ኮይኑ፡ ንበደላት ጉጅለ ህግደፍ ኣመካልኻንዮም ዑቕባ ሓቲቶም ዜጋታት ኖርወይ ኮይኖም ከብቅዑ፡ ነቲ ኣሳጊጉና ዝብሉዎ ስርዓት ብማሕበራዊ መራከቢታትን ኻልእን ክድግፍዎ ምጽንሖም ድሕሪ ምርግጋጹ፡ ወረቀቶም ናይ ምስራዝ ስጉምቲ ወሲዱ ምህላዉ”ዩ ዝነግር።
መርማሪት ጉጅለ ክኢላታት UDI፡ ኣብ ዙርያ”ቶም ንጉጅለ ህግደፍ ዝድግፉ ኤርትራውያን ስደተኛታት ተዘዋዊሩ፡ ሓበሬታ ክእክብ ምጽንሑ ዝገለጸ ማዕከን ዜና ኖርወይ፡ ማሕበራዊ መራኸቢታቶም ብምብርባር፡ ካብ ኣብ ኖርወይ ዝርከቡ ኤርትራውያን ተቓለስቲ ሓበሬታ ብምእካብን፡ ዝተጸንዐ ቀጻዒ ስጉምቲ ኣብ ምውሳድ ምህላዉ”ዩ ዝገልጽ።
እዚ ኣብ ልዕሊ ዜጋታት ኖርወይ ብUDI ዝተዋህበ ዜግነት ናይ ምስራዝ መስርሕ፡ ኣብ ታሪኽ እታ ሃገር ዝተራእየ ናይ ፈለማ ክስተት ኮይኑ፡ ቀንዲ ምኽንያቱ ድማ ነቲ ቃሎም ዝሃብሉ ስርዓት ኣብ ምድጋፍ ምህላዎም ምኳኑ”ዩ ኣብ ኣብ ክፍሊ ኢሜግሬሽን UDI ሓላፊ ቁጽጽር ዝኮነ ዳግ በርቫር ዝገልጽ።
መርማሪ ኮሚተ UDI ብድምር ኣብ ኣስታት 135 ኤርትራውያን ስደተኛታት፡ ሓበሬታ ናይ ምእካብ መስርሓት ከምዘካየደ ዝገለጸ እቲ ማዕከን ሓበሬታ፡ ኩሎም ብሰባኣዊ ግህሰትን ውልቀምልካዊ ምሕደራ ስርዓት ህግደፍ ኣመካንዮም፡ ኣብታ ሃገር ዑቕባ ብምሕታት ዜግነት ዝተዋህቦም ኖርወጃውያን-ኤርትራውያን ምኳኖምን፡ ዝወሓደ ሸውዓተ ዓመታት ኣብታ ሃገር ዝጸንሑ ምኳኖምን”ዩ ወሲኹ ዝገልጽ።
ክሳብ ሕጂ ፍቓድ ትሕቲ 20 ኤርትራውያን ጥራይ ኢና ሰሪዝና ዘለና ዝበለ በርቫር፡ እንተኾነ ግን ዝያዳ ክስርሑ ዝግቦኦም ጉዳያት ስለዘለዉ እንተዘይኮይኑ፡ እቲ ወረቀት ናይ ምስራዝን፡ ካብታ ሃገር ናይ ምጥራዝን መስርሕ ክቅጽል ከምዝኮነ”ዩ ዝገልጽ።
ሕጋዊ መንበሪ ፍቓድን ዜግነትን ምስራዝ፡ ኣዝዩ ከቢድ ስጉምቲ’ኳ እንተኾነ፡ ኣብ ሕጊ ኢሚግሬሽን እታ ሃገር ግን ሕጋዊ መሰረት ከምዘለዎ ዝገልጽ እቲ ሓበሬታ፡ ሓደ ወጻእተኛ ኮነ ኢሉ ብዛዕባ ዑቕባ ምክንያት ዘይቅኑዕ ሓበሬታ እንተሂቡ፡ መንበሪ ፍቓድ ክስረዝን፡ ክሳብ ካብታ ሃገር ክስጎግን ከምዝኽእልን ዝገልጽ ሰነድ ናብቶም 20 ዝኾኑ ወረቀቶም ዝተሰረዘ ኤርትራውያን ዜጋታት ከምዝተላኸ”ዩ ዝገልጽ።
እቲ ብመንገዲ ነርዌጃዊ ማዕከን ዜና NRK ዝወጸ ሓበሬታ፡ UDI ጉዳያት ንመስርሕ ዑቅባ ኤርትራውያን ስደተኛታት መሰረት ብምግባር፡ ኣብ ልዕሊ 70 ኖርወጃውያን-ኤርትራውያን መንበሪ ፍቓድ ናይ ምስርዝ ፕሮጀክት ክወስድ ከምዝኽእል ዝጠቀሰ ኮይኑ፡ ነርወይ ወላ”ኳ መሰል ዜጋታት ናይ ምግሃስ ስጉምቲ እንተዘይወሰደት፡ እቲ ክሳብ ካብ ሃገር ናይ ምብራር ዘስዕብ ስጉምቲ እንተ ተተግቢሩ ግን፡ ቀንዲ ምኽንያት ባዕሎም እቶም ዜጋታት ምስ ጉጅለ ህግደፍ ዝመስረትዎ ምሕዝነትን፡ ኣብ ናይ ዑቅባ ቃሎም ዝፈጠርዎ ምድንጋርን ምኳኑ”ዩ UDI ዘርድእ።
UDI ቀጺሉ፡ እቶም ሓተቲ ዑቕባ ኣብ ኤርትራ ካብ ወተሃደራዊ ኣገልግሎት ሃዲሞም ከምዝተሰዱን፡ ዳግማይ ናብታ ሃገር እንተተመሊሶም ከቢድ ነገር ክበጽሖም ከምዝኮነን ብምግላጽ፡ ኣብ ኖርወይ ፍቃድ ምርካቦም ዝጠቀሰ ኮይኑ፡ ይኩን እምበር ድሒሩ ኣብ ዝተገብረ መርመራታት ግን እቶም ስደተኛታት ነቲ ኣሳጒጉና ዝብልዎ ስርዓት ብንጥፈት ከም ዝድግፍዎ ዘረድእ፡ እኩል መርትዖ ምስናዱ ብምጥቃስ፡ ሕቶ ዑባቅ ምርካቦም ቅኑዕ ውሳነ ኣይነበረን ብምባል፡ መንበሪ ፍቃዶምን ዜግነቶን ንምሕዳግ ምውሳኑ”ዩ ዘረድእ።
ድሕሪ”ቲ ኣብ ጎደናታት ኖርወይ ኣብ ሞንጎ ደገፍቲ ምልክን ተቃለስትን ዝተኻየደ ባእሲ፡ ፖሊስ ሓያለ ሰነዳት ክእክብ ብምካኣሉ፡ ነቲ ናይ መርመራን ዳህሳስን መጽናዕቲ ንቕድሚት ክስጉም ከምዘካኣሎ ዝጠቀሰ በርቫል፡ ኖርወይ ብናይ ሓሶት ምስክርነት መንበሪ ፍቃድን ሒዞም ንዝነብሩ ዜጋታት መሰል ክትህቦም ከምዘይኮነት”ዩ ዘተሓሳስብ።
