ዕልዋ መንግስቲ ብሰራዊት ኣብ ጊኒ ቢሳው

ሃገራዊ ሰራዊት ጊኒ ቢሳው፡ ሰለስተ መዓልታት ድሕሪ ኣካታዒ ፕረዚደንታዊ ምርጫ እታ ሃገር፡ ንፕረዚደንት ሲሶኮ እምባሎ ኣብ ቀይዲ ብምእታው ስልጣን ከምዝተረከበ ኣፍሊጡ።

ትማሊ ረቡዕ ኣብ ሰዓታት ድሕሪ ቀትሪ፡ ኣብ ርእሰ ከተማ ቢሳው ኣብ ዝርከብ ቤተመንግስቲ ብርቱዕ ተኹሲ ድሕሪ ምስምዑ፡ ሰራዊት እታ ሃገር ብቅጽበት ንፕረዚደንት “ኦማሮ ሲሶኮ እምባሎ” ኣብ ትሕቲ ቀይዲ ከምዘእተዎን፡ መንግስታዊ ስልጣን እታ ሃገር ውን ተቆጻጺሩ ምህላዉን ዝገለጸ ኮይኑ፡ እቲ ወተሃደራዊ ሓይሊ ንኩሉ መኣዝናት ኣፍደገ ዶባት እታ ሃገር ብምዕጻው፡ ነቲ ሰንበት ተኻይዱ ሓሙስ ክእወጅ ትጽቢት ክግበረሉ ዝጸንሐ ድምጺ ናይ ምእካብ መስርሕ ደው ኣቢልዎ ከምዘሎ”ዩ ዝገልጽ።

ኣብ’ታ ሃገር ማእሰርቲ እቲ ፕረዚደንትን፡ ዕልዋ መንግስቲ ብወተሃደራዊ ሓይሊን ዝሰዓበ፡ ቀንዲ ተቓዋሚ ፖለቲከኛ እታ ሃገር ካብ ሃገራዊ ምርጫ ከምዝተኣልየ ድሕሪ ምግላጹ፡ ኣብ ናይ ሰለስተ መዓልታት ፍልልይ ኮይኑ፡ ነዚ ዘይተቀበለ ሰራዊት እታ ሃገር፡ ኣብ ልዕሊ እቲ ፕረዚደንት ስጉምቲ ብምውሳድ ላዕለዋይ ሃገራዊ ስልጣን ከምዝተቆጻጸረ”ዩ ኣፍሊጡ ዝርከብ።

ሎሚ ሓሙስ ንህዝቢ ክግለጽ ትጽቢት ተገይሩሉ ዝጸንሐ ሃገራዊ ምርጫ እታ ሃገር፡ ኣብዚ ሕጂ ሰዓት ምሉእ ብምሉእ ከም ዝተሰረዘ ዝተገልጸ ኮይኑ፡ ፕረዚደንት ኡማሮ ሲሶኮ ኤምባሎን፡ ቀንዲ መወዳድርቱ ፈርናንዶ ዲያዝን ተዓዋቲ ምዃኖም ዝእውጅ መግለጺ ድሕሪ ምሃቦም፡ ሰራዊት እታ ሃገር ስጉምቲ ምውሳዱ”ዩ ዝንገር።

ኣብ ርእሰ ከተማ እታ ሃገር ዝርከቡ ናይ ዓይኒ መሰኻኽር፡ ትማሊ ከባቢ ፍርቂ መዓልቲ ከቢድ ድምጺ ቶኽሲ ከምዝተሰዐ ዝሓበሩ ኮይኖም፡ ይኹን እምበር ዋና እቲ ተኹሲ መን ከምዝኮነን፡ ወይ ውን ዝኾነ ይኹን ጉድኣት ምውራዱን ዘይምውራዱን ዘነጽር ሓበሬታ ዘይምህላዉ”ዮም ዝገልጹ።

ብመሰረት ጸብጻብ ማዕከን ዜና ፈረንሳ (AFP)፡ ኣማኢት ዜጋታት እታ ሃገር፡ ከቢድ ቶኽሲ ክስማዕ ድሕሪ ምጅማሩ፡ ብኣጋርን መኪናን ካብቲ ከባቢ ክርሕቁ ከምዝተራእዩ ዝገለጸ ኮይኑ፡ እቲ ስልጣን ሒዙ ዘሎ ወተሃደራዊ ሓይሊ ኣብ መንግስታዊ ተለቪዥን ቀሪቡ ንህዝቢ ኣብ ዝሃቦ መግለጺ፡ “ኣኽባሪ ስርዓት ወተሃደራዊ እዝ” ብዝተባህለ ወተሃደራዊ እዚ፡ ተወሳኪ ሓበሬታ ክሳብ ዝወሃብ ነታ ሃገር ሓላፍነት ክመርሓ ምኳኑ”ዩ ዝገልጽ።

እቲ ንፕረዚደንት እታ ሃገር ኣብ ቀይዲ የእትዩ ዝርከብ ወተሃደራዊ ሓይሊ፡ ህዝቢ ጊኒ ቢሳው ክረጋጋእን፡ ካብ ዝኮነ ረብሻ ክቁጠብን ዝጸውዐ ኮይኑ፡ ብዘይካ እቲ ፕረዚደንት ካልእ ኣብ ቀይዲ ዛኣተወ ኣካል ምህላውን ዘይምህላዉን ግን፡ ዛጊት ዝጹር ዘይምኳኑ”ዩ ዝረኸብናዮ ሓበሬታ ዘረድእ።

ጉኒ ቢሳው፡ ኣብ ትሕቲ መግዛእታዊ ስርዓት ነዊሕ ዓመታት ዝጸንሐት፡ ኣስታት 2 ሚሊዮን ህዝቢ ጥራሕ ዝነብራ፡ ብድክነት እትፍለጥ ኣፍሪቃዊት ሃገር ብምኳና፡ ምስ ኤርትራ ብብዙሕ መልክዕ እትመሳሰል ሃገር ኮይና፡ እዚ ብሰራዊት እታ ሃገር ተወሲዱ ዘሎ ጸረ ምልካዊ ስርዓት ዝተበገሰ ስጉምትን፡ ኣብ ዝሓለፈ ሳምንታት ኣብ ማዳጋስካር ዝጋጠመ ተመሳሳሊ ፍጻመን፡ ነቲ ንልዕሊ 34 ዓመታት ኩሉ ዓይነት መሰላቱ ተሓዲጉ፡ ኣብ ግብ ዝበለ ናይ ባርነት ሃለዋት ዝነብር ዘሎ ሰራዊት ኤርትራ፡ ኣኺሉ ዝተርፍ ትዕዝብቲ ክኸውን ዝግባእ”ዩ።