ላዕለዋይ ልኡኽ ፕረዚደንት ዶናልድ ትራምፕ ኣብ ጉዳያት ኣፍሪቃ ማሳድ ብሉስ፡ ኣመሪካ ኲናት ሓድሕድ ሱዳን ደው ንምባል ዘቕረበቶ ዳሕረዋይ እማመ “ወገናዊ’ዩ” ንዝብል ነቐፌታ ነጺግዎ።
ኣመሪካ፡ ስዑዲ ዓረብ፡ ግብጽን ሕቡራት ኢማራት ዓረብን ኣብ መንጎ እቶም ንልዕሊ ክልተ ዓመት ኣብ ርሱን ኲናት ተጸሚዶም ንዘለዉ ሰራዊት ሱዳንን ዕጡቓት ዳዕመ-ሰሪዕን፡ ክሸምግላ ይፍትና ምህላወን ዝፍለጥ ኮይኑ፡ ትማሊ ሰንበት ኣዛዚ ሰራዊት ሱዳን ዓብደልፈታሕ ኣልቡርሃን ኣብ ዝሃቦ ቃል፡ ድሒሩ ዝቀረበ እማመ ምቁራጽ ተጻብኦ ቅቡል ከም ዘይኰነን፡ ሕቡራት ኢማራት ዓረብ ኣብቲ ሽምግልና ክሳብ ዝሃለወት፡ እቲ እማመ ንሓደ ወገን ዘሻረወ ከም ዝኮነን ምግላጹ ዝዝከር”ዩ።
ማሳድ ብሉስ ንጉዳይ ሱዳን ኣመልኪቱ ብሰሉስ ኣብ ዝሃቦ መግለጺ፡ ነቲ ሕቡራት ኢማራት ዓረብ ንዳዕመል-ሰሪዕ ትሕግዞ ምህላዋ ዝገልጽ ክስታት ዝነጸገ ኮይኑ፡ ኣብቲ ኣብ ጉዳይ ሱዳን ሰለማዊ መፍትሒ ንምርግጋጽ ዝተጸውዕው ሽምግልና፡ ከምቲ ጀነራል ዓብደል ፈታሕ ኣልቡርሃን ዝበሎ ዝዀነ ዓይነት ወገናውነት ከምዘየለ”ዩ ዝገልጽ።
ማሳድ ቡሎስ ምስ ኣማኻሪ ፕረዚደንት ኢማራት ዓረብ “ኣንዋር ጋርጋሽ” ኰይኑ ኣብ ዘካየዶ ጋዜጣዊ መግለጺ፡ ኣብ ባይታ ዘየለን ብኣና ቀሪቡ ዘይፈልጥን ነገር፡ ከም መወከሲ ኮይኑ ይቀርብ ኣሎ ዝበለ ኮይኑ፡ ኣብደልፈታሕ ኣልቡርሃን ብዛዕባ እንታይ ይዛረብ ከም ዘሎ ዋላ ሓንቲ ንፈልጦ የብልናን፡ ክብል ንመግለጺ እቲ በዓል ስልጣን ከምዝነጸገ”ዩ AFP ዝሕብር።
ጀነራል ዓብደል ፈታሕ ኣልቡርሃን ብሰንበት ኣብ ዝሃቦ ናይ ቪድዮ መደረ፡ ዳሕረዋይ እማመ ውጥን ሰላም ሱዳን እቲ ዝኸፈአ”ዩ ክብል ዝገለጸ ኮይኑ፡ ምኽንያት ቃላቱ ክገልጽ እንከሎ ውን ንሰራዊት ሱዳን ዕሽሽ ዝበለን፡ ዕጡቅ ሓይሊ ዳዕመ-ሰሪዕ ከም ዘለዎ ክቅጽሉ ዘፍቅድን ምኳኑ ብምጥቃስ”ዩ ከምዘይቅበሎ ዝገልጽ።
ንላዕለዋይ ልኡኽ ፕረዚደንት ዶናልድ ትራምፕ ኣብ ጉዳያት ኣፍሪቃ ማሳድ ብሉስ፡ ቅድመ-ዅነት ከቐምጠልና ፈቲኑ ብምባል ዝከሰሰ ጀነራል ኣልቡርሃን ኣስዒቡ፡ ንሕና ደለይቲ ኲናት ኣይኰናን፡ ሰላም’ውን ኣይንነጽግን ዝበለ ኮይኑ፡ እንተዀነ ግን ዝዀነ ሰብ ከፈራርሓና ወይ ቅድመ-ዅነት ክገብረልና ግን ኣይክእልን’ዩ፡ ብምባል”ዩ ነቲ ቀሪቡ ዘሎ ዳሕረዋይ እማመ ሰራዊት ሱዳን ከምዘይተቀበሎ ዘረጋግጽ።
ማሳድ ብሉስ ኩሎም ሱዳናውያን ንዝደልይዎ ውዕል ሰላም ዕንቅፋት ከይከውን ንሰግእ ኢና፡ ዝበለ ጀነራል ኣልቡርሃን ወሲኹ፡ ሰራዊት መንግስቲ ሱዳን ወላ”ኳ ንውዕል ሰላም ቅሩብ እንተኮነ፡ ኣብ ሱዳን 2ተ ሰራዊት ክህሉ ንዘፍቅድ ዝኮነ ይኩን እማመ ግን፡ ክሰማማዓሉ ከምዘይኮነ”ዩ ዘረጋግጽ።
ኣመሪካ እትርከበን ሃገራት ኳድ (Quad) ምስ ስዑዲ ዓረብ፡ ግብጽን ሕቡራት ኢማራት ዓረብን ብሓባር ብምዃን፡ ኣብ ወርሒ መስከረም ኽልቲኦም ወገናት ንሰለስተ ኣዋርሕ ዝጸንዕ ሰብኣዊ ዕርቂ ክግበሩ ሓሳብ ኣቕሪበን ምንባረን ዝዝከር ኮይኑ፡ ነቲ ስምምዕ ስዒቡ ውዕል ምቁራጽ ተጻቦኦ ክፍጸምን፡ ኲናት ደው ብምባል ምስግጋር ስቪላዊ ምሕደራ ክግበርን ዝጠልብ እማመ፡ ንዕጡቅ ሓይሊ ዳዕመል ሰሪዕ ከም ሰራዊት ቆይሙ ክቅጽል ዝገብር ብምኳኑ ክቅበሎ ከምዘይኮነ”ዩ ጀነራል ኣልቡርሃን ዝገልጽ።
ኣብቲ እዋን እቲ፡ ብጀነራል ዓብደልፈታሕ ኣልቡርሃን ዝምራሕ ሰራዊት ሱዳን፡ “ናይ ወጻኢ ምትእትታው” ንጹግ’ዩ ዝብል መልሲ ምሃቡ’ውን ይዝከር ኮይኑ፡ ንዅነታት ሱዳን ብቕርበት ዝከታተሉ ወገናት ብተመሳሳሊ፡ ንዕጡቅ ሓይሊ ዳዕመ-ስሪዕ ከም እትሕግዝ ተደጋጋሚ ግዜ እትኽሰስ ሕቡራት ኢማራት ዓረብ፡ ኣብቲ ሽምግልና ከም ኣሸማጋሊት ኣካል ኮይና ምቅራባ፡ ሽግር ሱዳን ኣብ ምፍታሕ ኣሉታዊ ተራ ክህልዎ ምኳኑ”ዮም ዝሰማምዑ።
