ዳይረክተር ኣገልግሎት ዜግነትን ኢሚግሬሽንን ኣመሪካ (USCIS) ዝኮነ ጆ ኤድሎው፡ ኣብ ልዕሊ “ፈጠርቲ ስግኣት” ተባሂለን ካብ ዝተመደባ ሃገራት ዝመጹ ስደተኛታት ነበርቲ ኣመሪካ፡ ጥንቁቅ ናይ ምጽራይ መስርሕ ክትግበርን፡ ዝተዋህቦም መንበሪ ፍቃድ ክግምገምን ዝእዝዝ ቀጥታዊ ትእዛዝ፡ ካብ ፕረዚደንት ዶናልድ ትራምፕ ከምዝበጽሖ ኣፍሊጡ።
ዳይረክተር ኤድሎው ኣብ ውልቃዊ ናይ X ሕሳቡ ኣብ ዘስገሮ ጽሑፍ፡ ንነፍሲ ወከፍ ካብ ስክፍታ ዝፈጥራ ሃገራት ዝመጹ ወጻእተኛታት ዝተወሃበ መንበሪ ፍቃድ፡ ‘ምሉእን ጽኑዕን’ ዳግመ ግምገማ ክግበረሉ ዝእዝዝ መምርሒ፡ ካብ ፕረዚደንት ዶናልድ ትራምፕ ተዋሂበ ኣለኹ ዝበለ ኮይኑ፡ በዚ መሰረት ክፍሊ ኢሜግሬሽንን ዜግነትን ኣመሪካ፡ ፈጠርቲ ስጋኣት ተባሂለን ካብ ዝተመደባ ሃገራት ንዝመጹ ወጻእተኛታት፡ ዳግማይ ብጽኑዕ ክምርምሮም ምኳኑ”ዩ ዝገልጽ።
ብመሰረት ሓበሬታ CNN፡ ምምሕዳር ዶናድል ትራምፕ “ፈጠርቲ ስጋኣት” ብምባል ዘቐመጠን ሃገራት ዓለም፡ ኣፍጋኒስታን፡ ኢራን፡ ሊብያ፡ ሶማልያ፡ ሱዳን፡ የመን፡ ኤርትራ፡ ሃይቲ፡ ቬንዙዌላ፡ በርማ፡ ቻድ፡ ሪፓብሊክ ኮንጎ፡ ኢኳቶርያል ጊኒ፡ ብሩንዲ፡ ኩባ፡ ላኦስ፡ ሴራሊዮን፡ ቶጎ፡ ከምኡ’ውን…ቱርክመኒስታን ኮይነን፡ ትማሊ ረቡዕ ኣብ ዋሽንግተን ዲሲ፡ ኣብ ልዕሊ ክልተ ኣባላት ሃገራዊ ድሕነት ዝተፈጸመ መጥቃዕቲ፡ ቀንዲ ምኽንያት ናይዚ ውሳነ”ዚ ከምዝኮነ”ዩ ዝንገር።
ፕረዚደንት ትራምፕ ንዝተፈጸመ መጥቃዕቲ ከም ምኽንያት ተጠቒሙ፡ ሰዓታት ድሕሪ እቲ መጥቃዕቲ፡ ዝያዳ ጽኑዕ ቁጽጽር ኢሚግሬሽን ክግበር ጌሩ ምህላዉ ዝገለጸ ሓበሬታ CNN፡ ምስዚ ብዝተኣሳሰር፡ ክፍሊ ሃገራዊ ድሕነት (DHS) ብወገኑ፡ ኣብ ዝሓለፈ ዓመታት ብምምሕዳር ባይደን ንዝጸደቑ ኩሎም ናይ ዑቅባ ሕቶታት ዳግማይ ይምርምሮም ምህላዉ”ዩ፡ ሲኤንኤን ዝገልጽ።
ትማሊ ረቡዕ ብዝተፈጸመ መጥቃዕቲ ዝተጠርጠረ ውልቀሰብ፡ ኣብ 2021 ኣብ ውሽጢ ኣፍጋኒስታን ምስ ኣመሪካውያን ድሕሪ ምስርሑ፡ “Operation Allies welcome” ብዝተሰምየ መስርሕ ናብ ኣመሪካ ዛኣተወ ምኳኑ ዝተገልጸ ኮይኑ፡
እቲ ጥርጡር ናብ ኣመሪካ ቅድሚ ምእታዉ ኣብ ዝተገብረሉ መርመራ፡ ብኹለ መዳዩ ንጹህ ምንባሩን፡ ከም ውጺኢቱ ድማ ኣብ ዝሓለፈ ወርሒ ሚያዝያ ዑቕባ ምርካቡን፡ ካብ ሓደ በዓልስልጣን እታ ሃገር ኣረጋጊጸ ዝበለ CNN፡ ኣብ ናይ ኣዋርሕ ግዜ ከምዚ ዓይነት ገበን ክፍጽም ብምካኣሉ፡ ምምሕዳር ትራምፕ ኣብ ልዕሊ ስደተኛታት ንዝጸንሖ ኣሉታዊ ኣተሓሳስባ ክዛይድ ጌርዎ ምህላዉ”ዩ ዝንገር።
