ጨካን ተግባራት ህግደፍ ኣብ ቀራና-ኩዶ

ጉጅለ ህግደፍ መቀጸልታ ናይቲ ኣብ ልዕሊ ህዝቢ ኤርትራ ዝፍጽሞ ዘሎ ገበንን በደላትን፡ ሕጂ ውን ከባቢታት ቀራና ጉዶ ኣብ እትርከብ ንእሽቶ ገጠር፡ ንሓደ መንእሰይ ቶኪሱ ከምዝቀተለ፡ ካብቲ ከባቢ ዝበጽሓና ሓበሬታ ኣረዲኡ።

እቲ ናይ ቅትለት ፍጻመ ኣብ ዞባ ጋሽ ባርካ፡ ከባቢታት ቀረናኩዶ ንኡስ ዞባ ሎጎ ዓንሰባ  ዝተፈጸመ ምኳኑ፡ ዝበጽሓና ሓበሬታ ዘረደአ ኮይኑ፡ ህግደፍ ነቲ ኣብ ሞንጎ ሓበላን ዴዳን ኣብ  እትርከብ ዓዲ ፈሓም ከፍሕም ዝተረክበ መንእሰይ ብጥይት ከምዝቀተሎ”ዩ ዘረጋግጽ።

እቲ ግዳይ ኣረሜንነት ጉጅለ ህግደፍ ኮይኑ ዘሎ መንእሰይ፡ ኣብ በረኻ ፈሓም ከፍሕም ካብ ዝረከብዎ ወተሃደራት ድሕሪ ምህዳሙ፡ ሒዝወን ንዝነበረ የእዱግ ዘሪዖም ክሃድንዎ ምውዓሎም ዝጠቀሰ እቲ ሓበሬታ፡ ኣጋ ምሸት ዝተዘርዓ  የእድጉ ክወስድ ምስቶም ወተሃደራት ምስ ከደ ግን፡ ብጥይት ቶኪሶም ከምዝቀተልዎ”ዩ ዝገልጽ።

ድሕሪ”ቲ ኣብ ልዕሊ ሓደ ሲቪል መንእሰይ ዝተወስደ ናይ ቅትለት ስጉምቲ፡ ህግደፍ ነበርቲ እቲ ዓዲ ዕግርግር ከይፈጥሩ ብምስጋእ፡ ነታ ዓዲ ብወተሃደራት ተከቢባ ክትጸንሕ ድሕሪ ምግባሩ፡ ብሓለዋ ወተሃደራት፡ ውሑዳት ኣባላት ስድራቤት ጥራይ ኣብ ዝተሳተፍዎ ናይ ቀብሪ ስነስርዓት እቲ መንእሰይ ከምዝተቀብረ”ዩ እቲ ናይ ውሽጢ ዓዲ ምንጪ ዝገልጽ።

ጉጅለ ህግደፍ ስነስርዓት ቀብሪ እቲ ግዳይ መንእሰይ ድሕሪ ምፍጻሙ ውን እንተኮነ፡ ካብ ዙርያ እታ ንእሽቶ ገጠር ከምዘይረሓቀ ዝገለጸ እቲ ሓበሬታ፡ ኣብ ዝሰዓበ መዓልታት ንኩሎም ደቂ ተባዕትዮ ነበርቲ እቲ ዓዲ፡ መራሕቲ ሃይማኖት፡ ድያቆናት፡ ኣቅሽሽቲ፡ ሓካይም ካልእን ሓዊሱ፡ ከባቢ 300 ዝኮኑ ዜጋታት ናብ ሓሽፈራይ ወሲዱ ኣሲርዎም ምህላዉ”ዩ ዝገልጽ።

ኣብ ልዕሊ ህዝቢ ኤርትራ ክቱር ፍርሕን ጽልእን ዘለዎ ጉጅለ ህግደፍ፡ ክመጾ ንዝክእል ተጻቦኦ ዜጋታት ብምስቃይ ከምዝቃለሶ ዝጠቀሰ እቲ ናይ ውሽጢ ዓዲ ሓበሬታ፡ ህግደፍ ኣብ ልዕሊ ሓደ ሲቪል መንእሰይ ድሕሪ ዝወሰዶ ናይ ቅንጸላ ስጉምቲ፡ ኣስታት 300 ዜጋታት ክስውር ምፍታኑ፡ እቲ ጉጅለ ኣብ ልዕሊ ህዝቢ ኤርትራ ንዘለዎ ፍርሕን ክቱር ጽልእን፡ ኣጸቢቅካ ክትርዳእ ዝገብር ምኳኑ”ዩ ወሲኹ ዝገልጽ።