ጉጅለ ህግደፍ: ኣብ ገዳማትን ቅዱስ ቦታታትን ዝፍጽሞ ዘሎ

ጉጅለ ህግደፍ: ኣብ ገዳማትን ቅዱስ ቦታታትን ንጽድቂ ኢሉ ዝተመጽወተ ገንዘብን ንብረትን ይምንጥል።

ጉጅለ ህግደፍ ከም መቐጸልታ ናይቲ ትካላት ሃይማኖትን ኣመንተንን ንምድኻም ዘካይዶ ዘሎ ኣረሜናዊ ተግባራት: ኣመንቲ ንጽድቂ ብመብጽዓን ሞባእን ዘወፈይዎ ገንዘብን እኽልን ይምንጥል ኣሎ።

ኣብ ዝተፈላለየ ኩርናዓት ሃገርና ተደኲኖም ዘለዉ  ጥንታውያን ገዳማትን ኣብያተ ክርስትያንን መካነ ማጨሎትን ብዘለዎም ታሪኻዊ ንዋየ ቅዱሳንን ፍሉይ ክብሪታትን: ኣመንቲ ዓመታዊ  ንግደትን ካልእ ኣጋጣምን ብምክያድ: ብድምቐት የብዕልዎን ይጽምብልዎን ኢዮም።

ኣብ ከምዚ ኣጋጣሚ ብነጋድያንን ብጸሎተኛታትን ንጽድቂ ንመብጽዓ ነቲ ገዳምን ቤት ጸሎትን ዝልገስ ገንዘብን እኽልን: ጉጅለ ህግደፍ ብዘይ ፍቃድን ፍታውን ኣመንትን ሓለፍትን: ክፋል ናይቲ ህያብን ምጽወታን ይዝርፍ ከምዘሎ ምንጭታትና ካብ ኤርትራ  ሓቢሮም።

ብዓይኒ ፍትሒ: ኣመንቲ ብመልክዕ ሞባእን ህያብን ንገዳማትን ቅዱስ ቦታታትን ዝለገስዎ ገንዘብ ይኹን ካልእ ንብረት: ንመማዕበሊ ንመጸገኒ ንመካየዲ ስራሕ እቲ ቦታ እምበር  መንግስቲ ብሕታዊ ዋንነት ዝማቆሎን ዝጫረተሉን ሞራላዊ ይኹን ሕጋዊ ሓላፍነት የብሉን።

ጉጅለ ህግደፍ:  ኣብ ዝሓለፈ ዓመታት ንትካላትን ንብረትን ቤት እምነታት ብምውራስን ንመራሕቲ ሃይማኖት ብዘይ ፍርዲ ንዓመታት ብምሕያርን ብዙሕ ገበናት ፈጺሙ ኢዩ። ብሰንኩ  ድማ ኣመንትን መራሕትን  ሃገሮምን ቅዱስ ቦታኦምን ገዲፎም ከምዝስደዱ ኮይኖም።

ትካላት ሃይማኖትን መራሕተንን: ካብ ፖለቲካን ኣእዳው መንግስትን ሓራ ኮይነን ብመሰረት ውሽጣዊ ሕጊታተን: መንፈሳዊ ኣገልግሎት ኣብ ክንዲ ዝህባ: ጉጅለ ህግደፍ  ብዝመደቦም መሓውራት ስለያን ካድራትን ከም ዝጎጃጀላን ሓድነት ኣመንቲ ከምዝልሕልሕን ኮይኑ ኢዩ።

ኣብ’ዚ እዋንዚ ኣብ ስደት ዘለዉ ኣመንቲ  ኦርቶዶክስ ተዋህዶ ቤተ ክርስትያን ኤርትራ: ኣብ ክንዲ  ብስኒት መንፈሳውን ሞራላውን ኣገልግሎት ምርካብ: ንፖለቲካዊ ሽርሒታት ጉጅለ ህግደፍ ዝተቐበሉን: ሃይማኖት ካብ ፖለቲካ ናጻ ክኸውን ይግባእ ዝበሉን ተኸፊሉን ንሓድሕዱ ተተፋኒኑን ይነብር ኣሎ።

ነቶም ንግጉይ ፖለቲካዊ መምርሒታት ጉጅለ ህግደፍ ዝነጸጉን ስሩዕ መንፈሳዊ ንጥፈታቶም ዘካይዱን መራሕቲ ሃይማኖትን ኣመንትን ብምውጋዝ: መንፈሳዊ ኣገልግሎት ንኸይረኽቡን ሬሳኦም ኣብ ኤርትራ ከይቕበርን ፍትሓት ከይግበረሎምን ኣዚዙ ኢዩ።

ከምዝፍለጥ ጉጅለ ህግደፍ: ሳልሳይ  ፖትርያርክ ኦርቶዶክሳዊት ተዋህዶ ቤተክርስትያን ኤርትራ ዝነበሩ ጳጳስ ብጹእ ኣቡነ ኣንጠንዮስ: ንጣልቃ ምእታውን ዘይሕጋዊ ኣሰራርሓን ህግደፍ ስለዝተቃወሙን ኣብ ሃይማኖቶም ስለዝጸንዑን: ካብ መዓርጎም ብምውራድን ክብሮም ብምቕንጣጥን: ን16 ዓመታት ብዘይ ፍርዲ ብምሕያን ብስቃይ ተቀቲሎም ኢዮም።