ቀንዲ ኣማካሪ ቀዳማይ ሚኒስተር ኢትዮጵያ ኣብ ጉዳይ ምብራቅ ኣፍሪቃ ዝኮነ ጌታቸው ረዳ፡ ኣብ ሞንጎ ኤርትራን ኢትዮጵያን ተፈጢኡ ዘሎ ግጭት፡ ናብ ኲናት ክበጽሕ ዝክእል”ዩ ዝብል ግምት ከምዘይብሉ ገሊጹ።
ጌታቸው ረዳ ነዚ ዝገለጸ፡ ኣብ ማዕከን ዜና ኣልጀዚራ ቀሪቡ፡ መህዲ ሓሰን ምስ ዝተባህለ ጋዜጠኛ ኣብ ዘካየዶ ቃለመሕተት ኮይኑ፡ ኣብ መንጎ ክልቲአን ሃገራት ሓድሽ ግጭት ክለዓል ይኽእል እዩ ዝብል ወረታት ይስማዕ ምህላዉን፡ ታንክታት ኢትዮጵያ ውን ናብ ዶባት ኤርትራ ገጸን ይጓዓዛ ምህላወን ብምጥቃስ፡ ኲናት ክህሉ ዲዩ ብምባል ጋዜጠኛ ንዘቅረበሉ ሕቶ ኣብ ዝመለሰሉ፡ ብወገኑ ኲናት ክህሉ”ዩ ዝብል እምነት ከምዘይብሉ”ዩ ገሊጹ ዝርከብ።
ኣብ ቃላቱ፡ ኢትዮጵያ ናብ ቀይሕ ባሕሪ ክታኣቱ ድሌት ኣለዋ ዝብል ዘረባ፡ ምስቲ ኣብ “ወደብ ዓሰብ” ዋንነት ኣለና ዝብል ሕቶ ዝተሓዋወሰ ትርጉም ከምዘለዎ ዝገለጸ ጌታቸው ረዳ፡ ኣነ ከም ዝፈልጦ ኣንጻር ልኡላውነት ኤርትራ ዝኾነ ይኩን ተኣማንነት ዘለዎ ሞጎታዊ ክርክር ከምዘየለ”ዩ ዝገልጽ።
ብዝወሓደ መዐቀኒ፡ ኣብ’ዚ ሓጺር ግዜ እዚ ናብ ኲናት ከምርሕ ዝኽእል፡ ዝኮነ ዓይነት ኲነታት ኣሎ ኢሉ ከምዘያኣምን ዝገለጸ ጌታቸው ረዳ፡ እቲ ኣብ ሞንጎ ክልቲኤን ሃገራት ዘሎ ምፍጣጥ ናብ ኲናት ከየምርሐ፡ ውልቀመላኺ ኢሳያስን ቀዳማይ ሚኒስተር ኣብይ ኣሕመድን፡ ቅልውላው ዘህድእ መፍትሒ መንገዲ ክረኽቡ እዮም ኢሉ ከምዛኣምን”ዩ ዝገልጽ።
ኣብዚ ቀረባ እዋን ናብ ቡሬ ክልል ዓፋር ተጓዒዘ፡ መንግስቲ ኢትዮጵያ ጽርግያ ክሰርሕ ተዓዚበ ዝበለ ኣቶ ጌታቸው፡ ብወገን ኤርትራ እውን ብተመሳሳሊ ጽርግያ ይስራሕ ምህላዉ ብምጥቃስ፡ዋላ”ኳ ኣብዚ ቀረባ እዋን ዘይምርድዳእ እንተተፈጥረ፡ ክሳብ ክንድኡ ዝኣክል ወፍሪ ዝገበርሉ ፕሮጀክት ስለዘሎ፡ ክልቲኦም ወገናት ኣብ ቀረባ ግዜ ተመሊሶም ክሰማምዑሉ ዝኽእሉ መንገዲ ክህሉ ከምዝኮነ”ዩ ወሲኹ ዝጠቅስ።
